O lea ua o’u tō- ia e a?

Fa’amālo lava!

E le taumatea ua e fa’agae’etia, fiafia, te’i, fefe/popole po’o lagona uma na. Po’o le ā lava ou lagona, o uiga masani ia. E tele ma anoanoa’i mea ete a’oina ma maua e uiga ile ma’i tō ma le ola fou o le ā e tauaveina i totonu ia te oe.
E te mauaina le tele o fa’amatalaga mai i ī, e te amata muamua ai.

Ole tagata muamua lava e te feso’ota’i iai o lau foma’i fa’aleaiga. E faia se su’esu’ega e fa’amautinoa ai ua e tō, ma ni su’esu’ega ole toto e siaki ai le tulaga masani o lou soifua maloloina fa’apea ni fa’amatalaga e uiga ile filifilia o sau fa’atosaga e va’aia oe.

 

Ua ou lē mautonu /pala’ai

Afai ua e ātu i lau tō, 'aua ete popole, e lē nā’o oe ua muamua o’o iai i lea tulaga. E leai se mea  ete tauaveina to’atasi ai ou lagona a’o e tō . Fa’asoa i se isi ete fa’atuatuaina ma ia va’ai lelei sau fa’atosaga (va’ai 'Find Your Midwife').  O lo’o to’atele fo’i ia tagata fia lagolago  fa’apea ma isi auaunaga e latou te fautuaina oe a’o e tō (va’ai ‘Pregnancy Support’).

 

O le a le Lead Maternity Carer?

Ole Lead Maternity Carer po’o LMC o ia lea e gafa ma le tausiga fa’apitoa o tinā ma’itō ma lagolago i a’i latou a’o tauaveina le tō, ile fanauga fa’apea ma vaiaso muamua (4-6 vaiaso) ole soifuaga ole pepe. O i latou nei e aofia ai ia fa’atosaga ma foma’i ua iai le tomai fa’apitoa ile va’aiga o so’o se tulaga/ gasegase tau tinā ma tamaita’i.

Ole  fa’atosaga (midwife) o ia ua iai le tomai fa’apitoa i tulaga tau ma’itō ma fa’afanauga o tinā, ma sa a’oa’oina i a’oga fa’apitoa tau fa’afailelega ma ua maua fa’ailoga fa’apitoa e resitaraina ai ma maua ai le laisene fa’alētulafono e galulue ai fa’atosaga.

Filifili ma le fa’aete’ete lau LMC, auā o ia o se  tagata tāua lava i lenei taimi. Va’ai se isi tinā /tama’ita’i e agava’a ma loto alofa, e lagolago i au fuafuaga mo le fanauga ole pepe, e fa’aaloalo i au tū ma aganu’u ma ua ia fa’ailoa atu ia te oe, ia nisi o fa’afitauli ma ona togafitiga e ono tutupu mai ile taimi ole fanauga. E tatau ona e fa’atuatuaina lau LMC.

O lau LMC e talanoa atu ia te oe ma fa’amautinoa o ou popolega ma lou fefe, ua uma ona fa’atalanoaina ma fo’ia. Afai ete lagona le lē māfana ole lua vā ma lau LMC pe e iai fo’i sou popolega i ai, e iai lau aiā tatau e sui ai lau LMC – o se mea e masani ma tatau ona sui pe afai e lē lelei le lua vā /galulue fa’atasi ma lau LMC (va’ai le ‘Find Your Midwife’).